By Engr. Bernie C. Cangrejo
Engr. Bernie Cangrejo delivered a binalaybay during the 116th Foundation Day celebration.
Una gid sa tanan ako anay ang matamyaw
Sa inyo nga tanan sg maayo nga adlaw
Kabay kamo tanan luwas sa Covid nga kagaw
Kg tanan pa may panabor, kaina sg namahaw
Gani kon handa na, updi nyo ako maghanduraw
Kita magbalik tanaw, sa CPU ma lagaw-lagaw
Sa lockdown pictures matan-aw, sa campus maduaw,
Makayuhom, makakadlaw, mabulong ang kahidlaw
Masulod kita sa gate, nga sg una very busy
May naga gilinual, may gabaisay dira pirme
Estudyante nga may klase alas siyete wala ID
Hambal sg guard no entry, university policy
Sa halfmoon kita anay, ang mag tulutambay
Mapa hangin-hangin, mapa tulo-tawhay
Kay basi si crush, malay mo, ang maglabay
Huo kay best friend, ara naga agbay, awit gid, aragay!
Kon Foundation kg Uday, sa halfmoon may hold-up panay
Kay dira ang baligya-anay, kay dira ang kan-anay
Allowance ni Inday, sa kekiam kg siomai
Alamutan sa Junior High, nagtupa sa pizza pie!
Old Valentine ga raginit, may gadalagan estudyante
Ga singgit, magpabinit, basi na late lang sa klase?
Basi may exam, o may defense, sa iya thesis study?
Indi ah, LBM gin atake, sarado CR sa may NV!
Sa NV ga ginutok kon dismissal na sg klase
Kay medyo makitid ang hagdanan kg ang hallway
Kg may pila pa sa Xerox kg sa photocopy
Kay lapit na ang Midterm, sa accounting sg CBA
Na miss ko man mga klase, sa building sg Roblee
Nga kon gab-i nagadali, mag dismiss laboratory
Kay basi magtuhaw kg makit-an ang white lady
Ga ugayong kay ginbasol, na naman sa breakage fee
Sa Uy Building lakat kita, didto, ta maniaga
Damu to pili-an, may chicken skin kg shawarma
May ara man siopao, hamburger, kg tinola
Kon combo meal may libre pa, las-ay nga juice, agwantaha!
Sa may Senior High School, sa ila bag-o nga building
Mga estudyante, ga kinadlaw, ga dinugsing
Ang topic sg convo, ang most recent nga trending
Na video-han, class president, naga ugtas sa meeting!
Sa Junior High School, sa ila campus matawhay
Daw sa SM nga paging, ila bagting sg lingganay
Kon mag dismiss na sa hapon, hala dalaganay
Mga estudyante gid nalipay, naga lagsanay!
Halin sa may third floor, sg Engineering building
Makita sa may field, CE students ga surveying
Samtang nagatabok mga Tourism kg Nursing
Magahod ang lawnmower sg hilamon gina cutting
Sa football field, damu pispis nga kurukukok
Damu man estudyante nga naga punsok-punsok
Pag tindog, ang sagbot ginabilin naga tumpok
Tani mag itom inyo ilok, kg buli nyo maghabok
Sa UC makadto kay ma attend CEW
Makanta kg mamati sg pulong sg Ginu-o
Dayon pangamuyo sg himpit kg todo-todo
Nga sa major mo nga subject indi ka ma singko
Sa Nursing building, sa Johnson, Franklin kg Weston
Pirme gid puno sg mga students, ga tipon-tipon
Ti kay nag pandemic kag wala na may nabilin
Basi ang naga istar mga murto na kg apparition
Sa may Kindergarten, dali kita kag mag sid-ing
Masadya kabataan, sa may playground sa may swing
May nagawawaw, kay indi gusto nga ibilin
Kon maglakat nagapila, holding hands ni Teacher
Sa Library, damu ga kadto, damu gatuon
Sa Filipiniana, Periodicals, Circulation
Kay wala gahod, kg mabugnaw, dayon malinong
Indi ayhan ang rason, matulog, mapa aircon?
Sa dining hall kon oras na sg tig palanyaga
Madamo customer, magutok, kulang lamesa
Malawig ang pila, kay kan-on na delay pa
Sa ginpangat nga bagungon kg latik nga kalabasa
Sa promenade sg una, dira pirme may programa
Centralian Star, Battle of the Bands, matan-aw ta
May pa concert, pa rally, fashion show, pa rampa
NSTP nga klase, kag reception sg kasal pa
Ang elementary, abaw puno sg kapagsik
Tungod sa mga pupils nga naga tirik-tirik
Ang yaya kg bantay naga panic sa diagnostic
Gani samtang gahungit, ga review arithmetic
Sa elementary pa gid, ay abaw kasadya
May ara sila, sg pa camping nga programa
Ila tent sulod kwarto, ang gamit kumpleto pa
Moskitero kg oven, may balon pa nga plantsa
Sa Admin building, pirme madamu nagapila
Mga estudyante nga mabayad sg matrikula
Faculty and staff makuha sg payslip nila
Kg dayon pang hayhay kay resibo na lng iya
Sa idalum sg akasya, pwede ka tulo-tambay
Upod sa kahagugma, istorya labay-labay
Samtang nga nagatunod ang adlaw dugay-dugay
Hana na maghalukay, prrrt, guard pitohi anay!
Sa Anahaw drive, kita ang malakat-lakat
Samtang nagatabok, medyo lang mag ulo-aligmat
Kay basi mabunggo-an sg CPU nga dump truck
Ay abaw, tetanus gid ang imo nga masagap
Foundation kg Uday, may streetdance sa karsada
Picnic sa picnic area, field demo sa open field ta
May ara parada, libot sa may Jaro Plaza
Ang tanan masadya, sg mass gathering pwede pa
Kadto ta Rose, may Mr & Ms, dayon ma eyeball
Kadto ta field, matan-aw softball dayon football
Kadto ta gym, macheer sa volleyball kg basketball
Kadto ta halfmoon, kay makaon squidball kg fishball
Kay online learning kg virtual classroom na kita
Pasenysa sa mga classroom nga wala na magamit pa
Imo dingding kg salog, gina silhigan pa bala?
Subong ta lang ikaw, na appreciate kg na miss ka
Na miss ko magsulat sa whiteboard nga tap-ingon,
Teacher’s table nga gubaon, bintana nga bukaon
Salamat gid sa mga tion, nga kaupod kamo nakon
Kamo akon palanggaon, sa pag balik ang kay-uhon.
Sa imo floor tiles kg chairs nga monobloc
Sa gahud sg ceiling fan nga naga ragaak
Sa pwerta nga kon maghangin dayon lagapak
Sa mga tapak-tapak, harakhak kg palakpak.
Sa mga estudyante, sa classroom naglabay
Sa mga gintukso, ginsermonan, kg ginsaway
Kabay may napuslan sa gintudlo kg laygay
Sg kita pa ang face to face, kg naga atubangay
Masakit batyagon nga kita tanan nagbulagay
Apang ang nag bayaay, masami man naga balikay
Kg I know in God’s time, kita liwat makitaay
Kon kumpleto na sa bakuna, kita liwat maupdanay!
Bow!